12/12/2017

Resaka tsy nifankahazo : Nametrapetraka ireo mpankafy azy ny tarika Kiaka

Tsy tonga hatramin’ny farany. Nametrapetraka ireo mpankafy azy ny tarika Kiaka, raha tokony hanolotra seho takariva ny zoma lasa teo tetsy amin’ny Trass Tsiadana. Tsy tonga teny an-toerana ny tarika, ary tsy nandray ny antso an-tarobia raha niezaka niantso azy ireo ny mpikarakara ny hetsika, ny tompon’andraikitry ny Trass eny Tsiadana. « Tsy nisy fampilazana na fialan-tsiny fa dia tsy tonga fotsiny izao izy ireo… Nanahirana ny nahazo azy ireo tamin’ny antso. Nisy azo ihany ny sasany tamin’ireo mpikambana izay nanazava fa miady an-trano ny tarika », araka ny fampitam-baovaon’ny Trass Tsiadana. « Tena manaiky ny fahadisoana izahay, ary mitondra ny teny fifonana amin’ireo mpankafy fa resaka tsy nifankahazo, fampitaom-baovao tsy nety no niteraka ny tsy fahatongavana », hoy kosa i Nini avy amin’ny tarika Kiaka raha nitondra fanazavana.

Nahagaga ireo mpankafy ity tarika izay vao avy nankalaza ny faha-25 taonany io tranga io, ary nanitikitika azy ireo amin’izao tranga izao ny fisian’ireo mpikambana ao amin’ny tarika, manana andraikitra na miara-dia amin’ny mpanakanto hafa andaniny, ary ireo manana ny asa aman-draharaha fivelomana ankilany, ka mahatonga azy ireo hanao tsinontsinona ny fiainan’ny tarika. « Tsy fahalalam-pomba, ary fanaovana tsinontsinona ny mpankafy ny tranga toa izao », hoy kosa ireo mpankafy nody maina, niandry ny tarika Kiaka teny Tsiadana. « Tena mitondra ny teny fialan-tsiny ho an’ny mpankafy izahay, ary mandray an-tanana fa fahadisoana avy aminay iny tranga iny », hoy hatrany i Nini, nanamafy ny fialan-tsininy.

 

Miarantsoa