19/01/2018

Kaominina Ivato : Notokanana ny CsbII, lalana, sekoly vaovao

Fotodrafitrasa miisa telo no natolotry ny fitondram-panjakana ho an’ny mponina eny Ivato, ary notanterahina omaly ny fitokanana azy ireo. Tao ny toeram-pitsaboana CSB II Ambodirano misy rihana iray, izay ahitana fandriana efatra sy fitaovana arifomba mifanaraka amin’ny tolotry ny mpitsabo. Ao ihany ny sekoly fanabeazana fototra Ilaivola izay ahitana efitra enina sy dabilio 70. Ny lalana ahafahana mivezivezy mankany amin’ny Institut National de Promotion Formation (INFP). Raha araka ny fanazavana voaray avy any amin’ny Ben’ny tanànan’ny kaominina Ivato, Penjy Randrianarisoa, dia tafiditra ao anatin’ny tetikasan’ny Filoham-pirenena ny fanamboarana ny toeram-pitsaboana, avy amin’ny hetran’ny kaominina kosa no nanamboarana ny sekoly sy ny lalana. Tonga nisolo tena ny Filoham-pirenena tamin’ny fitokanana ireo fotodrafitrasa ireo moa ny praiminisitra lehiben’ny governemanta, Solonandrasana Olivier Mahafaly.

Hita taratra tamin’izany fotodrafitrasa izany ny fiaraha-miasa teo amin’ny kaominina sy ny fitondram-panjakana foibe ary ny ezaka teo amin’ny fandoavan-ketra nataon’ny vahoaka teny an-toerana, ka nahafahana namerina ny vokatr’izany tamin’ny vahoaka indray. Raha araka ny vaovao voaray hatrany moa, dia afaka 2 herinandro dia hanomboka ny fanamboarana ny tsena, araka ny efa fampanantenana nataon’ny fanjakana tamin’ny vahoaka eny ifotony. Ny olana misy mantsy dia lasa tsy manara-penitra intsony ny toerana satria tsy voahaja ka anjakan’ny loto, eny ihany koa no fanararaotan’ireo mpanao hadalana.

 

Anna Ra.