19/12/2018

Kandidà ho filoham-pirenena : Samy hanova lalàm-panorenana

Notanterahina omaly tetsy amin’ ny Carlton Anosy ny adihevitra, nandraisan’ireo kandidà miisa 17 anjara. Nandritra ny adihevitra, dia samy nitondra ny programan’asany avokoa ny tsirairay. Niraisan’ny ankamaroan’ ireo kandidà nandritra ny famelabelarana nataon’izy ireo, ny hanafoanana ny antenimieran-doholona sy ny fanovana lalàm-panorenana. Mikasika ny Antenimieran-doholona, dia samy nilaza ireo kandidà fa fandaniana be fahatany ny fisian’io andrim-panjakana io. Ny antenimieram-pirenena dia afaka mandany lalàna. Mikasika kosa indray ny lalàm-panorenana, dia nambaran’izy ireo fa mahatonga disadisa ny lalàm-panorenana ankehitriny. Porofo mivaingana ny zava-misy nandritra ny fitondrana nisy teo aloha, noho io lalàm-panorenana amin’izao fotoana io. Tsapa ihany koa nandritra ny adihevitra ny fametrahan’ireo kandidà, ho vaindohan-draharaha ny sosialim-bahoaka sy ny lafiny ara-toekarena.

Iratra Raitra