19/11/2018

Fetin’ny Mozika : Misokatra ny fisoratana anarana ho an’ireo manan-talenta

Miditra amin’ny andiany faha-37. Ankalazaina isaka ny 21 Jona ny fetin’ny mozika. Toa ny isan-taona, manokatra ny sehatra ho an’ireo manan-talenta ny Alliance Française etsy Andavamamba, ary misokatra ho an’ireo liana ny handray anjara amin’izany ny fisoratana anarana. Hisy araka izany ny fifantenana ireo manan-talenta sy ireo mpanakanto vao misondrotra. « Misokatra ho an’ny mpanakanto rehetra io na mpihira, mpamorona sy mpandrindra, olon-tokana na amin’ny tarika, tsy misy fetran-taona ary tsy mifidy karazana mozika », araka ny fampitam-baovan’ny Alliance française. « Ny fahasamihafan’ny mozika entina sy ny fomba fiseho an-tsehatra no hitsarana ireo mpandray anjara », hoy hatrany izy ireo.

Hifarana ny 24 febroary ny fisoratana anarana ho an’ireo maniry ny handray anjara maimaimpoana izany. Ny 3 marsa no hanaovana ny fifantenana etsy amin’ny AFT Andavamamba. Tsiahivina fa anisan’ireo toerana iray nanosika mpanakanto malagasy efa manana ny lazany ny Aft, raha tsy hitanisa afa-tsy ry Gangstabab, Samoela ary Dah’Mama.

Miarantsoa