17/07/2018

Antenimieran-doholona:NAHAZO 119 TAPITRISA AR TAMIN’I INDE

Nampihantaina. Nivaly ny fangatahan’ny teo anivon’ny Antenimieran-doholona amin’ny tokony hamatsiana fitaovam-piasana ho azy ireo.

Nanome sy nanolotra vola mitentina 119 tapitrisa Ar ho an’ity andrim-panjakana ity ny teo anivon’ny masoivohon’i Inde, monina sy miasa eto amintsika. Araka ny fampitam-baovao, vola hoentina hamatsiana fitaovana ho an’ireo mpiasa sy ny ho an’ny mpikambana eo anivon’ny birao maharitra ao amin’ny Antenimieran-doholona etsy Anosy izany. Raha ny voalaza hatrany, vola hoentina hamatsiana solosaina, «imprimante », latabatra fiasana sy fampirimana antontan-taratasy, sns, ity natolotry ny masoivohon’i Inde ity. Izany hoe, laharam-pahamehana amin’izany ny famatsiana ireo birao fiasan’ireo mpikambana eo anivon’ny birao maharitry ny Antenimieran-doholona, toa ny biraon’ireo tale isan-tokony, sns. Tafiditra amin’izany koa anefa ireo pitsopitsony madinika rehetra fampiasa amina birao lehibe toa ity andrim-panjakana eny Anosy ity. Voalaza fa noho ny adidy sy andraikitra goavana sahanin’ny Antenimeran-doholona amin’ny firenena no anton’ny fanohanana sy fanampiana azy ireo tamin’ny alalan’ny famatsiana ara-bola.

Ankoatra izay, tsy nohadinoin’ny masoivohon’i Inde, monina sy miasa eto amintsika, ny nankasitraka ny fitondram-panjakana tamin’ny ezaka goavana vita tamin’ny nandraisana ny fihaonana an-tampon’ny Frankôfônia, andiany faha-16, notanterahina ny 22 -27 Novambra teo, teny amin’ny CCI Ivato.

Etsy andaniny, voalaza fa manohana ary eo anilan’i Madagasikara hatrany i Inde amin’ny fifanaraham-piaraha-miasa isan-tsokajiny, indrindra eo amin’ny lafin’ny fampandrosoana ara-toekarena.

 

MN